Хамгийн алдартай 10 киноны хөгжим (#4-1)

4. James Horner – Braveheart theme (Braveheart киноны хөгжим)
Бидний сайн мэдэх Star Trek II, Cocoon, Aliens, Willow, Glory, A Beautiful Mind, болон Titanic зэрэг кинонуудын гайхалтай хөгжмүүдийг зохиосон хүн бол оркестрын болон киноны хөгжмийн зохиолч James Horner билээ. Түүний бас нэгэн алдартай бүтээлийг энд дурдахгүй байхын аргагүй. Энэ бол 1995 онд бүтээгдсэн Braveheart киноны хөгжим юм. Энэхүү кино нь оскарын шагналаас таван номинацид ялалт байгуулсан юм. Киноны хөгжмийн хувьд Ирландын үндэсний хөгжим болон бусад олон төрлийн аялгууг нэгтгэж өгснөөрөө гайхалтай болсон ба Лондоны Симфони Оркестр анх тогложээ.



3. Clint Mansell - Lux Aeterna (Requem for a Dream киноны хөгжим)
Pop Will Eat Itself хамтлагийн дуучин гитарчин байсан Clint Mansell кино урлагийн ертөнцөд 1996 оноос орж иржээ. 2000 онд Requem for a Dream киноны хөгжмийг зохиож ихээхэн нэрд гарсан юм. Энэхүү кино нь донтолтын олон төрлийг харуулсан ба киноны гол дүрүүд үүний улмаас хэрхэн доройтож, уруудаж буйг үзүүлдэг.
Киноны хөгжмийг Kronos Quartet тогложээ. Mansell-ийн онцлог бол чавхдаст хөгжмүүдийн хослолуудыг гайхалтай хийсэнд оршино. Хөгжмийн нэр нь Lux Aeterna бөгөөд сүүлийн үед чавхдаст хөгжмөөр хүйтэн, хөндий, ая тухгүй нөхцөл байдлыг санагдуулам тоглосон үед Lux Aeterna гэж нэрлэх болжээ. Хэр алдартай бүтээл болсон нь үүнээс харагдах ба одоо ч гэсэн олон төрлийн бүтээлүүдэд ашиглагддаг байна.


2. John Williams – Somewhere in my memory (Home Alone киноны хөгжим)
John Williams алдарт Home Alone-ий хөгжмийг 1990 онд зохиожээ. Энэхүү кино нь найман настай Kevin хүү гэр бүл нь Парис явсан хойгуур гэртээ ганцаараа хэрхэн адал явдалтай учирч байгаа тухай гардгийг хэн хүнгүй мэдэх биз ээ. Харин киноны хөгжим нь зул сарын баярын үеэр эгшиглэдэг алдартай хэдэн хөгжмийн нэг болжээ. Магадгүй та киноны хөгжмийг төдийлөн сайн мэдэхгүй, санахгүй байвал энэхүү видеоны 1:40 минутаас хойш дотно танил аялгуу угтан авах болно.


1. James Horner – Hymn to the sea (Titanic киноны хөгжим)
Мэдээж James Horner-ийн бүтээлүүдээс хамгийн алдартай нь Titanic киноны хөгжим юм. Найруулагч James Cameron анх Enya-д хөгжмийг нь зохиох хүсэлт тависан ч Enya татгалзан Horner-ээр хийлгэхийг хүсчээ. Харин Horner энэхүү киноны хөгжмийг Enya-ийн стиль, өнгө аясыг оруулан туурвиж Норвегийн дуучин Sissel Kyrkjeb-ээр арын хоолойнд дуулуулсан байна. Мөн түүнчлэн киноныхоо хөгжмөөс ч алдартай болсон Celine Dion-ий My Heart Will Go On дууг Horner хамтран зохиожээ. James Horner энэхүү бүтээлээрээ хоёр оскар хүртсэн бөгөөд Titanic кино саяхныг хүртэл хамгийн их ашиг орлого олсон бүтээл байсан билээ.